لجام
@@@@@@@@
أدور ف عقلي وفين الكلام
واهيس وازعق ف وش المدام
وازعل ولادي وارمي السهام
وخاصم وصالح ف عز الهيام
وحاالي يلخبط عقول الكرام
واشخبط ولخبط وارسم حمام
وأحس إني جاهل وناقص علام
وأحس إني عايز أبطل كلام
وأدور ف نفسي مفيش إنسجام
وفكره تجيلي وتجري أوام
وأدور عليها ف بطن الظلام
نفسي قصيده تكون الختام
وأقول الحقيقه برغم الآلام
لساني معاند ولابس لجام
وعامل مطنش ورافض ملام
وباع القضية ف وسط الزحام
وسابني لوحدي وقالي سلام
ياغاوي المشاكل كفايه حرام
هتفضل مكابر وعامل هُمام
وماشي لوحدك ف وسط الغيام
وتنفخ في قربه وعايز لحام
وتقطع ف قلبك بدون إهتمام
وتدن ف مالطه ياعمي الإمام
وصوتك يجلجل ف وسط النيام
ومين اللي يصحي يقولك تمام
ومين اللي فاهم في شعرك كلام
ومين اللي يقدر يرد اللئام
ياريتك تبطل وترمي سلام
وتنسي شعورك وتنسي الهيام
وترجع لنفسك وتترك أوام
وتحضن ولادك وترضي المدام
وتحسب معاها البطاطس بكام
وتمسح وتضبخ بكل إحترام
تعلم ولادك اصول النظام
وتشعر بإنك عليك إلتزام
تفكر ف بكره بكل إهتمام
وتنسي المشاعر يا عمي الإمام
وتقفل دماغك وآخر تمام
وتمسك لسانك هتلقي السلام
وراسك ف ريشك كأنك نعام
وخالد يصحبك وعمك حسام
وتلقي حياتك ف وسط العوام
منعم مدلل وتعرف تنام
ياريتك تقرر يا عمي الإمام
@@@@@@@@
بقلم // طه إبراهيم
ليست هناك تعليقات:
إرسال تعليق