الغلابه هناك ضحيه
واللي عنده فلوس هرب
راح بلاد مافيهاش أذيه
قبل ما يشوف العجب
واللي معاهوش قال نصيبي
موتي مكتوب فوق جبيني
هيا موته ولا أكتر
والنصيب هتشوفه عيني
والقنابل نازله تدبح
والرصاص زي المطر
والبيوت اكوام ب ناسها
والجناين والشجر
والولاد عماله تبكي
ليه كفااايه يا بشر
والمرض مالي الاماكن
والمدارس صوتها ساكن
والسما بقي لونها إسود
والحياه بقي لونها داكن
والأمان بقي حاله نادره
واللي باقي شهيد وذكري
وإتقسمنا لألف فرقه
والخلاف خلانا نكره
والمطامع إيه تساوي
والمكاسب والفتاوي
جنب جثه أم هامده
وطفلها ع الارض هاوي
وكان زمان ييجوا الاجانب
بالسلاح يحتلوا فينا
والسلاح دلوقت عربي
والدمار جي بإدينا
والشهيد ف حروبنا عربي
مش غريب ولا حتي غربي
واللغه والرب واحد
بس علي احوالنا عجبي
بس علي أحوالنا عجبي
عماد وهبه
ليست هناك تعليقات:
إرسال تعليق