عـلمنــي
يا أستاذي وملاذي
يا طربوشي وعكازي
عـلمني
إزاي بتكون الكلمة ف طرف لساني وتهرب مني
مع إني
مغني
ودا
فني
وبأرسم كل وشوش الناس ف العين والنني
وبأضحك ضحكة تهز شعورالليل وتعدي
لبكرة تعدي
تشد الفقرا معاها وتجري
تغني
غنا يفرحهم
ويفرحني
وأعرف أحسب كل كلامي
قبل ما أقوله ويورطني
قبل ما يجرح خلق الـله
قبل ما كل الناس تعاتبني
ولاعمري ف مرة
قولت كلام
مُر
غبي
غشيم يهلكني
وأعرف أتكلم كلام هادي وجميل
كلام بلسم يشفي العليل
وبالى مرتاح وطويل
ورأيى دايماً كان دليـل
للعطشان
والحيران
والمتألم
والغضبان
الكل بيسمعني ويرتاح
وكلامي مخلوق للأفراح
وأهني الناس وأعـزيهم
وف العيد أعيد عليهم
و رضايا هو رضاهم
وكل حياتي كلام متنقي
برقة وذوق
وأعرف أدوق
وأعدالشوق
وأحسب ف النسمة
من تحت لفوق
وأعد المطر
قبل ما ينزل على جبيني
لكني
ساعة م بأشوفك كل كلام الكون يهزمني
ويهرب مني
عـلمني
***************
علمني
إزاي بيموت المعنا ف بطن الشاعر
قبل ما يطلع
قبل ما يوصل حتا القـلب
قبل ما يِفرح
وقبل ما يوجع
وقبل ما كل الناس تعرف تسمع
وقول لي
إيه فاضل منك
ومني
يبقا هدية لإبنك
وإبني
عـلمني ياشاعـر
كيف المشاعـر
وى الأحباب
وى الاغراب
أصل أنانساي
ما أعرفشي إزاي
عايش كداب
وبقيت نصاب
وإنت الحساس
وياك إخلاص
علمني إزاي
بتشوف الناس
وإزاي بتحب الناس تركبنا
تحطم آمالنا
تشل رُكبنا
وتسحب حتا بساط الخير
من تحت خيولنا
وتحت رِكابنا
وتعلم أولادنا
تكره وطنا
وتسلفـنا
وتدينا
وتكسرنا
وتفرض كل كلامها عـلينا
وتحتل بلدنا
غصبن عني
عـلمني
*************
علمني
إزاى الضيف إن بات
يتكشف السر
وإن عدا وفات
بيموت الشـر
وإزاى أكرم ضيفي
من غير شر
وأقفل بابي عليا وأجتر
ريحني ورسيني
وعديني لبـر
دا البير خاين
بيبيع المية بالقنطار
لناس غرقانة مع التيـار
ناس سكرانة ليل ونهار
ناس كدابة
ناس أشـرار
تدبح ديك الفجر الصاحي
وتهرس عضمه علي الانياب
وتأكل لحمه الحامي
والبارد
وتيجي تنام لي على الاعـتاب
ناس بتكسر لى ف ألابـواب
وتغلي علينا اللـقـمة
تملي
وبماء الوجه ف سهرة
تحلي
وتبيع أيامنا ف ضحكة
يا لللي
وتبيع ف كنوزنا الخام
قطن خام
بترول خام
رمل خام
كل شىء فى بلدنا خام
بكام مليم وكام
ومش عارفين تصنعوه يا عمى
يا همى
عليك وعلينا يا همى
عـلمني
************
علمني
إزاى خد العذاري دبل
والحُمرة مش طبيعية
هو الحّمار يا إخوانا
ح ييجي م الطعمية
وإزاي يشد الحيل
إللي بيلحس مش
زي المباني الجاهـزة
ف ثانية المبني يهش
ما هو مبني
غش ف غش
وأدينا قاعدين
حامدين
شاكرين الرب
مع إن القلب
إبتدا يتسرب منه النبض
ويسقط مع شلال التوهة
النازف
جوة وبرة القلب
يعضك عض
الجيب الفاضي
فيه قرشين
واحد مخروم
والتاني ممسوح
والتالت ممنوع م الصرف
والظرف
الحالي نده لي
وقال لي
جاك هفة تهفك هف
جاك داهية تزفك زف
زفة مهفوف
زفة مهموم
زفة فاشل
زفة معدوم العقل
وعقلي عشانك مخاصمني
سابنى وتاه
قرفان مني
يا عاقل
يا عقلانى
عـلمني
*********************
علمني
إزاى ورد الجناين عطش
وبعت لي كوز فاضي
باين عليه إتلطش
وفاكرني أنا القاضي
وبيقول لي إملا
يا خلي
وإلا إنت مش راضي
يهون عليك يا تبوت
ورد الجناين يموت
ودول المنابع بنت
ف حياتنا سدود
والطريق مسدود
صهينة ويهود
والنمل طلع له سنان
والكلب قام
والسبع نام
وبرج الحمام إتقفل
ولا عدشي فيه وارد
وقفت غيلان الغـفل
تشنق لنا الوافد
والجرح صار قاسي
والذنب عداني
وغطاني
والليل مضلم عـليا
والكلبة عضاني
ومصاني
وأنا نفسي قبل ما أموت
آكل يا ناس ضاني
ولا مكتوب عليا القشف
يسكن لي ف لساني
ويألمني
عـلمني
***********
علمني
وإرقيني
وحصني
أصل الرشوش خلص
والخضة لساها
بتنهش ف حسي
وأنا نفسي
ف يوم متهني
سبع سبوع الولد
ونبوس
والداية عايزة فلوس
وتدوس
على خد حساده
دوا ولبوس
فـراخ وبط ووز
والأم رافـضة تهز
ولا حتا شربة مية
ولاحتا طبخة رز
وباقي الولاد تاهووا
ولد شيال
والتاني نشال
والتالت صرماتي
والبت بتبيع فل
ف الإشارة وف الممر
لاهدمة جديدة
ولا لقمة مفيدة
ونومة حقيـرة
ع المخدة والحصيرة
ف حوش حقير
ف ترب الغفير
والحمام طوابير
لا سكن
ولا عنوان
ولا أحلام
والحال ما يسر
وحياتنا مُر ف مُر
مع ناس نسايا لناسها
ويبيعوا أعضانا ف أول ورشة
كل شىء ف بلدنا صفقة
ومنين أجيب للداية
والأم نسياية
وبتنسا وتـولد
وأنا إللي الدهر دهولني
علي ضهري
وحملني
علمني
**************
علمني
صبح العلام غالـي
وعالي
وعالى النخل ما يطلعه
إلا إللي كان عالي
بأخلاقه
وحبه لأهله
وحبه لبلده
وسهر الليالى
يا أبـويا إبكي عـليا
وفيا
إزرع الأحزان
والإوهام
والهموم
والحمول
أطنان
وإدعي معايا
إلهي يخلصني من دا لسان
إللى مش يهمد
ولا يركح ولاينهد
إللي جالبلي المتاعـب
وشابب
تقولشي عـود خرزان
ومش عايز يسكت على ظالم
بيظلم يوم إنسـان
ينطق مني
غصبن عنى
وممكن يدخلني اللمان
وبرضوا بأقول الحق
ولو شفت العذاب ألوان
يا أبويا ليه علمتني
م أكنشي جبان
علمتني أحافظ على بيتي
وأقف على غيطي
ددبان
وأحرس بلادي من الغجـر
وأفدي ترابها بدمي
لكني
ف علامك ذاد همي
ولقتنى واقف لوحدي
والكل مخاصمني
يا أبويا ليه سبتني
للناس والايام
تعلمني
وأديني بعدك
بأطلب علام
ومن غيرك يعلمني
عـلمني
****************
الشاعر / رمضان فؤاد أبو الوفا
ليست هناك تعليقات:
إرسال تعليق