## بكل شئ بتأثر ##
مش عايزه اتعلق بحد
مش عايزه حد يقربلى
والله بتكلم بجد
محدش يقول مستغربلى
عايزه اكون بعيده
وابعد عن اى علاقه
مش عارفه اكون سعيده
وانا قلبى طبعه الحماقه
دايما احساسى سابقنى
وده منتهى الغلط
موضوع بجد مدايقنى
فى ناس بتسميه عبط
بكل شئ بتأثر
وبشغل بالى وفكرى
وقلبى فيا يتكسر
والغضب فى دمى يجرى
انا طبعى بجد صعب
انتم لسه مش فاهمين
بوصف احاسيسى بالرعب
عشان غالبها الحنين
الرأفه بيا بقى
وخليكم احسن بعيد
متخلوش مصيرى الشقى
مش عايزه قلبى شريد
ابعدوا عنى وهمكم
حرام الكيان تملكوه
بتخلونى ليه اشتقلكم
والقلب ترجعوا ترموه
سيبوا خيالى فاضى
وبلاش تعيشوا جواه
كل شئ فيا مش راضى
تعبت من دى حياه
#بقلم:شيماء الدالى#
ليست هناك تعليقات:
إرسال تعليق