°°°( يا أجمل بنات حوا )°°°
بعرف مكانى فى القلوب متصان
لو خانّى حلمى عمرى ما ابقى جبان
هنام من تانى واحلم بجنة حب فى عيونك
وأرسم على جفونك خجل
وأرسم أمل يحينى عمر طويل
سايل على فمك رضاب النيل
إزاى أكون إنسان بلا حبك !
وأنا جنبك ،
بحب الليل واحب البحر وجنونك
واحب الحب لعيونك
وعينك فيها سحر النيل
- فلا تلومى على العاشق
ولا تلومى على حالى
وخالى لو يشوف حسنك
أكيد ينسى مرات خالى
يصير حاله فى حال يشبه غرام حالى
ويعمل صفحة ع الفيس بوك ينشر فيها موالى
ويلعن الليلة اللي شاف فيها مرات خالي
- وعمى ،
اااااااااااه من دماغ عمى
يشوفك مره يتغندر
ويتعنتر
ويعمل فيها شيخ أزهر
ويصدر فتوى على كيفه
يقول عنى هدر دمى
ويدبحنى ولا يسمى
عشان خاطرك ،
عشان عاشقك ،
عشان فاكرك
جمالك انتِ مش عادى
يا حبى ومطلبى وحلمى
- أنا مش عاوز إلا الحب فى عيونك
يا رب الدنيا ما تخونك
أنا عاوز أغنيلك
أكون سيفك وأكون خيلك
أكون شمسك وأكون نيلك
يا مهرة أصيلة من بلدى
ووردة من رياض بلدى
يا ريت منك يكون ولدى
وبنتى تشبهك انتِ
بحبك انتِ فين كنتِ
- حروف اسمك على بابى
على كتابى
على دولابى
يا أحبابى أنا العاشق
أنا المجنون
أنا الفرحان
أنا السكران لو اسمع اسمى فى كلامها
وأحلامها تجيب العشق قدامها
- يا سمره
يا سمره وأحلى مصريه
يا ورده جميله ف عنيا
يا أغلى مهره عربيه
يا فرحى ومهجتى انتِ
وانتِ من بنات الحور
بعينك ألف ضحكة تدور
وترسى بقلبى وبعينى
ما بين الشوق وما بينى
غرام يسحر ،
وعين تأسر ،
وبسمة شوق تنادينى
- أنا وانتِ وليلة حب تجمعنا
قمر سهران على كفوف الهوى معنا
وطير واقف على الأغصان بيسمعنا
أنا العاشق وانا المعشوق
ولو حبك منام ليله
هنام عمري وعمري ما افوق
وشوق من شوقى لعيونك يزيد الشوق
- عاشقك أنا يا أجمل بنات حوا
والقلب من جوا
بتسكنيه وحدك
ما اقدرش على بعدك
رغم البعاد والله
باقى على عهدك .
--( من العامية المصرية ، بقلم / محمود زعير )--
ليست هناك تعليقات:
إرسال تعليق