♥♥♥ وبحلم ♥♥♥
وبحلم حلمي يتحقق
وألاقي القدس حضناني
ونور الفجر بيشقشق
يبوس القبه من تاني
وفوق المدنه بيكبر
حمام أبيض وبينور
قمر ليلك وتتمخطر
جناين من زيتون أخضر
وتوب الفرحه بيلالي
ونجمه نورها في العالي
بتتمايل وتتعاجب
تقول النصر شئ واجب
أقول يا أرض عربيه
ترابك حنه في إيديه
دمانا لأ مهيش ميه
غيطانك جنه في عنيه
ويصبح نبضنا ساعد
ومهما الدنيا هتباعد
خطاوينا هتتواعد
ويفضل مجدنا فارد
جناحاته ويجمعنا
وصوت الحق يسمعنا
نقول يا ظلم ودعنا
كفانا هوان بتوجعنا
وقبل الصبح ما يصبح
لقيت عرافة بتصبح
وبتقولي بلاش تسرح
بلاش تبني قصور أوهام
وليه تحلم وليه تجرح
بأحلامك شعور أصنام
محال يا بني في يوم تفرح
وقدامك وحوش ع الباب
ياريت تنسى ياريت تمسح
دي أحلامك بشوفها سراب
دي أحلامك بشوفها سراب
#أحمد__الجندي
ليست هناك تعليقات:
إرسال تعليق