سلام يا قصيدتى /بقلم الشاعره/ عبير الجندي

؛؛ قصيـــــــــدة شعــــــــــــر ؛؛

**********************************

سلام يا قصيدتى ..

آه يا سفينتى .. يا مطلوقه للسموات

حروفك هى تكوينى ..

وهى حكايتى من جوه 

فى قلبك كل ما فىّ 

جبال الضعف والقوه

حروف مُره .. حروف حلوه ..

وبحر شطوطه ورديّه

يا باقيه لىّ .. ساقيه زهور ليالىّ



سلام يا قصيدتى ..

آه يا مدينه .. لسه حزينه فى حروفها

لابد تكونى بسمة حب ..

تلغى م الولاد خوفها

يشوفها التايه الحيران ..

ياخدها نجمه فى دروبه

تكون لبلاب على بابه ..

ونسمه تهز أعلامه

تحقق كل أحلامه ..

وأحلام اللى قلبه شريد



قصيدتى ..

لابد تبقى جزيره ورديّه 

وسحريّه 

يغنوكى الفواعليّه ..

وسكان القصور والنور 

تكونى (طبق حروف مسحور) 

تكونى جاره للقمره

تجيبى بكره قبل الليل ..

ما يرسم ع الوجود بكره

تكونى الفكره جوه الفكره ..

والشمعه الملاليّه



قصيدتى .. إنتى عكازى ..

إذا ليله زمانى خان

وإنتى النسمه .. 

وانتى البسمه ..

والأمطار على قزازى

وإنتى ثورة البركان 

فى كل كيان بعيش فيكى

باحبك يا قصيدة الفجر ..

بعد الفجر أنده من جديد ليكى 

واغنيكى ..

وأخدك فى الليالى بساط فى قلب الريح

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

** عبيـــــــــــــر الجنــــــــــــــدي **