جيل النت
ابن الكوبة طلع القبة
نفخه الباشا بفحل كرنبة
اسمه عكاشة وامه نتاشة
وأبوه يعنى كان مزجانجى
ساب مدرسته ورمى كراسته
وعمل القصة بجل وكفتة
وتبع الموضة وعاش فى الأوضة
حياته النت ويعاكس البنت
ويشوف أفلام ويعيش أوهام
وكأنه فى دنيا غير يعنى الدنيا
ويحب يقلد جونى وكتالونيا
يلبس فى هدوم مع بنطلون
مرفوع فى حالات وساقط ده ساعات
وساعات مقطوع وساعات مبلول
والبوكسر موضة ويقولوا برامودا
والبنت سنية تبع البلدية
تلبس عالموضة مقطوع برامودا
ماشية بتتكلم فى تليفون يا معلم
هى وامثالها سماعة فى ودانها
تحكى لساعات وتعمل حركات
و تقزقز لب وتشوف فى كليب
بين جنة ونار ليل ويا نهار
النت لحسهم وغير فى حياتهم
ويعيشوا فى دنيا مش هى الدنيا
و الفيس مكتوبه مزاياه وعيوبه
وصور ألاهرام عالانستجرام
ولابس لى سويتر ويكتب فى تويتر
ده سلاح حدين لعليش وحسين
وده ليه فى آثار بين جنة ونار
طب ليه تحتار لازم تختار
وتخش الجنة وتهرب من النار
وتاخد مزاياه وتسيب فى عيوبه
الجيل الرابع غرضه التدمير
لشباب الأمة ويقولوا تغيير
ابدا دى مؤامرة واثرها كبير
فوقوا يا شباب وكفاية غياب
الحلوة خدوها والوحشة سيبوها
علشان نتقدم ونخدم فى بلادنا
والأصل عاداتنا بتزين اوقاتنا
حضارتنا امانة لينا ورسالة
نديها لولادنا ونهديها لاحفادنا.
مع تحيات الفقير إلى الله
ياسر شرف
كبير محررين مترجمين
باتحاد الاذاعة والتلفزيون
ليست هناك تعليقات:
إرسال تعليق