كرم الهوى
يا صاحب الكرم نخلك ليه عالى
ولا طايل بلحه ادوق منه
ولا النوم بالليل لعيونى حالى
بلح وامهات وكل الحلا منه
واليوم على المستنى ليالى
ولا بيهزه الريح ولا يوقع منه
طعم السكر فيه على بالى
لفيت حبالى لجل اطلع ادوق منه
والعزم والقوه بيحكو عن حالى
وعشمان اطلع لفوق ادوق منه
لكن جريده بينى وبينه حالى
ماعرفت اقطف العسل منه
ما طلت منه غير يادوب جرابيح
واتغرزت فى قلبى اشواكه
ياما الهوى قلب وبقى ريح
والصياد طرح مالم حتى شباكه
النخل عالى لكن يهزه الريح
كل اللى طلع ماسلم من اشواكه
ينزل والقلب منه مكوى جريح
صياد ولا صادت فى يوم شباكه
صاحى انا من قبل التسابيح
طمعان بس ادوق بلح كرمك
ما شفت غير الجريد والليف
وقلت نخل كرمك على عالى
شوكك يا كرم الهوى كيف
شمت فيا ليه ياجريد عزالى
انا مادقت العسل منك صحيح
كفايه اعدد جمبك على حالى
كفايه شوك صبحت منك جريح
ولا عارف اغنى ولا اقول موالى
احلى مافيك يا هوى تجاريح
وبيك انا مشغول بالى
الشاعر/عزالدين جبريل
ليست هناك تعليقات:
إرسال تعليق