قلبـــــى معــــــــاك
؛؛؛؛؛؛؛؛؛؛؛؛؛؛؛؛؛؛
قلبى معاك .. فى كل حته تحبها
تسعدنى روحك يا حبيبى بقربها
واكتب عليك أشعار بتتحدى الحروف
ولا جوه روحى وقلبى خوف
ولا شايفه غيرك فى الزحام
آه يا وليفى يا أحلى من كل الكلام
ضاعت من الروح الآلام
وبقيت فى توب أبيض جديد
إيه اللى خلى القلب فى قربك سعيد ؟
طيبتك .. وحبك لىّ .. يا نهر الدفا
يا ضله زى الفله حاضنه الأرصفه
يا شراع أمانى للغريب
أنا لو هاقول عنك حبيب
هابقى ظلمتك يا شراع الفرحه فى نهر الحنين
قبلك وعهد الله يا غالى ..
كان طريق الكون حزين
آه يا رغيفى لو أجوع
آه يا ملخص للطريق ..
اللى اخدنى معاه هناك
وانت الملاك .. لسه بينده لىّ ..
من سابع سما
إنت الحروف متنغمه
وانت اللى خَلَّى البيت بيعلى كل يوم
إطفى الهموم
وارجع لأيامى بقى
الدنيا تصبح يا حبيبى بدون عنيك
ضلمه .. حزينه .. ضيقه
انت اللى خليت الشقا ..
يهرب وتتحول حياتى أمنيات
ما انت اللى فات وانت اللى جاى
عمرى ما اقول ازاى هويتك .. أو أتوه
يا ضحكه فى كل الوجوه
يا اللا بقى يا حبيبى نتحدى الرياح
ننسى اللى راح
ونعيش فى لحظات الهدوء
من غير تعب
حبة تراب يا حبيبى من إيدك دهب
لمسه وهمسه من عنيك
هانسى بها .. كل الجراح
؛؛؛؛؛؛؛؛؛؛؛؛؛؛؛؛؛؛؛؛
عبير الجندي
ليست هناك تعليقات:
إرسال تعليق