ومع كل طلعة شمس
بسمع الهمسه
بتغزل الصوره
بنوته.. سنيوره
والاسم
شمس
.....
بحبك ومغرم صبابا
شاعر وبفنى ع الربابه
بحبك والكون عل الميه
وانا والروح والجنه ف الامس
.....
الصبيه ...
فراشه طايره بتكتب بصوابعها الصغنتوته
قصيده فوق كتاف الشمس
الصبيه بتفتح الشباك
بتقابل بشاير النسايم
والكون هادى
اصلو
كان نايم
.....
بحبك والقدر طاير
واخد ف احضانه كل احلامى واحلام
بيكتبلى النهايه ف البدايه
والصبيه متلجمه ف القصه
والقدر عيونو مفنجله وعمرها ما تنام
البدايه كالعاده
كلمه بتكسر حاجز الاحلام
تبقى الحكايه حقيقه
حب
وهيام
وعلى غفله
يطل القدر
يضحك
ضحكه تملى الكون
ييجى الخريف دبلان
تسقط الشجره فروعها
والجنه تبقى... قافله ابوابها
والنجم ف السما بينحرق
ويحرق معاه كل الكتب
من الحروف حتى الورق
تصحى الصبيه
وكانها كانت ف حلم بينسرق
تصرخ باعلى الصوت
ملعون ابو الحب
ملعون ابو الموت
واطرح انا سؤالها على الملكوت
ليه القصه ملعونه ؟
مين اللى بيقطعها؟
ومين بيحرق البرواز الجميل دا والصوره؟
مييييييييييييييييييييييييييييييين؟
حسن المصري
ليست هناك تعليقات:
إرسال تعليق