انفوشي اسكندرية..............
ا.د.حمدي الجزار
...............
البحر نايم بيحلم
الشمس فاردة شعرها علي وش القمر
مراكب صغيرة بتتهز
زي رقص الصبايا في الفرح
موجة بتعلي وتطوي
وسمك يلعب تحت المية
قناديل جاية غضبانة مستفزة
وقف يا جدع...........
بكيني احمر ظهر من بعيد
جسم ملفوف كانه منحوت
سرق من الشط العيون
ضحكة تشوف اولها
اخرها غطس مع صبية
تحت الماء
خناقة علي تمن الشمسية والكراسي
شمسية في الهوا طارت
حلة رز وسمك وبطيخة
اتفضلوا يا جماعه
عم الحاج نام خدته غفلة
موجة غرقته شقية
صوت كاسيت عبد المطلب بيهز الشط
نادوا يا اخوانا علي الواد البعيد
ما فيش غطاسين
والبحر دواماته كتير
ملاعب كورة للعفاريت
الحق ياواد جزمة عم ابراهيم
الموج سحبها......
ازازة خل نفعت
ضد قرص القناديل
فرشوا الغدا علي جرانيل
ياللا يا جماعة باسم اللا
الشمس بتحمي والارض بتلسع
ياللا ياجماعة احنا ماشيين
.........
د.حمدي الجزار
ليست هناك تعليقات:
إرسال تعليق