يا كـــدابة
هات الخشب وولع
ويلا ياعمي إدفا
وإكمش كدة م السقعة
أصل العشا مش كفا
وهات تعريفة مخرومة
ويلا هـ نلعب رفا
يلا ملك وكتابة
يا كدابة
نوليني القلة
وشيلي الصدا م الحلة
فكي النحس شوية
أرجوكي إديني هـوية
أمشي بيها ف الشارع
أصل الحملة قوية
وأنا نفسي عزيزة شوية
شرقاوي من الشرقية
معروف عنى الحنية
واخد ع الشالية ونارها
وأحب الشاي ف الولعة
وأشرب كرسي معسل
وأطير ف الدخانة
ياغلبانة
يا تعبانة
يا كسلانة
يا همدانة
يا قاعدة ف صالة بيتكوا
من غير ولعـة
تباتي كدة ف السقعة
يا دي الفـقـعـة
من دي الوقعـة
تلاقى الأوضة
باردة وواسعة
والشتا ف بلدنا رهيب
تقولشي ف ترعة
فوقي يا قرعـة
شعرك دايماً زاين غيرك
يا نحيلة وغيرك واكل طيرك
قولي لابوكي يقوم يدفا
مون عربيتك يلا
وغيّر زيت وإتهنا
ورص الكرسي التاني
وشد ف آخر شدة
وإغسل كل العـدة
ولما توفي العـدة
الست هـ تلبس فضة
وتنسا تقوم تتوضا
وتنسا صلاة العـيـد
وصاحبنا إندار ع القبلة
ويخش عريس الغفلة
والواد ف اليوم التاني
وإبتدا يشتاق للدخلة
وما عدشي يهم ننام
والعام يجي بعد العـام
ومدام ف البيت الولعة
يحللنا معاها القاعـدة
وننسا حروف كلمتنا
وسهلة لكل فيران الدنيا
يخشوا يعيشوا ف بيتنا
ويناموا معانا ف غيطنا
ويكلوا زوروعنا
ويدوسوا كلمتنا
يا كتاب مكتوب بحروف الجهل
إزاي هـ تفيد الناس
إزاي هـ يكون ف حروفك ماس
وجواهر تتباس
وإزاي من غيرالكلمة الواعية
هـ نفهم معنا
مين يحرمنا
ومين يوجعنا
ومين يهدينا
ومين ينفعنا
يا مادنه عليكي أدان العلم جمعنا
وندانا وقربنا
ومين بعّـدنا
ومين فرقنا
مين بالفتنة الدينية ضربنا
ومين بالطائفية قتلنا
ومين من جيرانا كِرهنا
ومين من قرايبنا كسرنا
ومين معاه العصاية
وبيضرب جمل الصبر الصابر
تحت عـلمنا
يا صخورالحكمة البايتة
التافهة
الخايفة
حالكم يشهدعلي أحوالكم
مين غيركم
وحولكم
وخلا النخوة تفوت أطباعكم
مين بالخنفسة طبعّكم
كانت الجدة زمان تحكي لنا
رجالة حافظة عهودها
عن رجالة عارفة واجبها
وإحنا أكيد صدقنا مثلها
إن النار خلفتها رماد
وعصرالرجولة إنتها
أصل الرجولة مقام
مش منظرة ومنجهـا
وجاكتة ليها كمام
صبحت كلاب سعـرانة
تنهش ما ليها لجام
الجار بيأكل جاره
ويتمنا يشرب ناره
يكره فرحه
ويعشق حزنه
ويكشف ستره
ويفضح سره
وأبوكرسي طار ف السما
فوق الخلايق نام
يقفل بيوت بالقلم
والفتح قول لي بكام
والكلمة بالطوابير
ويقولها ميت خدام
والمسألة مُعـضلة
والحل ميت فـدان
وإللي قرا له كتاب
جاهل إصول دينه
بايت يا ناس تخمان
وما يرضا بقليله
بياع ف دين الـله
ويذل ف عبيده
يللي ف طبعك نوم للضهر
قوم إتوضا وصلي الفجر
وإدعي إله العرش يغّير
طبع إخواتك
وقوم وإلحق لم حجاتك
فاتك
قطرالصبح أهو فاتك
وغيرك خد مكانك
وعدوك خد حياتك
والرزق إتوزع من بدري
من غير يا خفيف حتا ما تدري
وإحترنا معاك يا أهبل
يا إبن الهبلة
إنت الاقرع
وإللى أمك هى القرعة
إنت الخايب الكسلان
وإللى أمك هى الخايبة
وعلي بال م تقوم من نومك
يفوت ليلك ويومك
ورزقك ياخده غيرك
وعمرك كله ليلك
ويدوب تلحق تتعشا
أو تتمشكح أوتتمشا
وتلم الخشب الباقي
وتقعد تانى تولع
وتكمش تانى م السقعة
أصل العشا مش كفا
****************
الشاعر / رمضان فؤاد أبو الوفا
ليست هناك تعليقات:
إرسال تعليق