أنا مصري وعرفوني
حرف وطني علي نيلها
سموني علي أسم نبي
كان عارف مقاديرها
بقيت شاعر بأشعاري
أكتب علي قدري مواويلها
ومهما عيوني تبات تبكي
بقوم الصبح أغنيلها
مراكبي ياما قاسي الويل
بيكره موجة التطبيل
ضميره تملي كان صاحي
لا بينافق ولا بيميل
كلامه من سنين ما أتمط
لكام كرسي شالوه يتحط
وأنا قلمي غريق ع الشط
بيكتب لك غني ومواويل
أنا قدري أكون جنبك
ولو شقيان هكون ذنبك
ولو عاشق أكون طوبة
تحمل همها همك
يا أم الطرحة والخلخال
يا أم الفرحة والموال
مهما الموج يكون عالي
لازم أفضل قريب منك
ومهما فيك إحنا نشوف
وحسينا بأنا ضيوف
أنا دايما بموت م الخوف
وشيء طابق في حلق الجوف
دايما يبعدك عني
وأنا ع الشط مستني
موجة تاخدني لعنيكي
ودفا قلبك يطمني
أنا كلي بدوب فيها
وحنة محنيه كعابها
نن عيوني دي ليها
وروحي فدا لترابها
ولما الريح تعاندها
تلقاني علي بابها
عيون تسهر لخدمتها
وأيد تزرع لأحبابها
وناب يفتك عدوينها
وحضن لكل أصحابها
وعافية في السما طايرة
تشد عزم أولادها
وحنية ساعات ثايرة
بقلب أبيض ما غضبها
علي كتافي هعديها
لنور وضيه في كتابها
يرجع تاني غناويها
ونيل فيه مية نشربها
وزرع أخضر يكفيها
وحاكم بالعقل يحسبها
-------
أنا مصري
محمد ضباشه
ليست هناك تعليقات:
إرسال تعليق