قولّلى ياقلمى
قوللّى ياقلمى ممكن تقدر
عن أفكار جُوّانا تعبّر
عن أحلام عمّاله بتكبر
تقدر تكتب عن أمانينا
عن أحضان بايته حزينه
قوللّى ياقلمى ممكن تقدر
ترسم للغرقان دا سفينه
حاول تكتب مرّه وشوف
حاول تكتب من غير خوف
حاول تكتب ع المكشوف
أوعى تخاف من سُلطة لَعِينه
تقدر توصف طفله جعانه
تكتب عن أوجاع وجعانه
تقدر أصلاً تبقى معانا
ماتفكّرشِ تِقسى علينا
تقدر تكتب سورة وأيه
توصف عِبره جُوّا حكايه
تكتب إيه معنى هدايه
يمكن بقى ربنا يهدينا
خايف تبقى ياقلمى خيال
وهم كبير يخدع أجيال
أخرك تكتب بس مَقال
هدفك بس كدا تسليّنا
عاوزك تبقى قلم بتّار
تقدر تاخد لينا التّار
وقت الضعف تكون ستّار
وقت الحزن كمان تواسينا
قولّلى ياقلمى حكايتك إيه
إيه اللى انت ناوى عليه
حبرك لونه محتار فيه
....................
إلى كل الأقلام التى تتخفّى تحت
أقنعه من السطور والكلمات وتتلّون
بلون الأوراق...
............
سيد عبدالوهاب
ليست هناك تعليقات:
إرسال تعليق