( فشة خلق بالعامية)
.......................
بعدك
.........
بعدو الجوري عخدك
سيد الألوان
بعدو الليل بشعرك
بيعلن العصيان
بعدك قطر الندى
غافي بحضن السوسني
بعدك فاتني وجمالك
قديش الله معتني
من فتني وسحر
لوحة ابدعا الرحمن
بعدو عشفافك
من حرقتو..
دايب العناب
وبعدك بتهمسي
بادن كانون
بيصير آب
وبعدني بفوت
عحقلك قطف الرمان
بسكر وبتسكري
ومنلعن الشيطان
بعدها الأساور
بتزغر بإيديكي
وبعدون
كل ماتوقع
عيونون عليكي
صرت اعرف ليش
بيغلطوا الرهبان
بعدك بتضيّفي
قلوب السكر حلا
وكل مابشوفك
بكتر صلا
ل الله يحرسك
وتضلي بأمان
وبعدني من عمر
كل مابشوفك
بسكر بلا خمر
وبعدون الوردات
من عندك بيعبوا العطر
وبعدو كل مالامس
شفافك بيسكر
الفنجان...
شو بخاف مايضل
بالدنيا حبر
وتموت كلماتي
بحضان السطر
وبياع الصبر
يسكر الدكان
مش عيب...
الاربعين بسنينك
مش عيب يكون
ديني مو نفس دينك
عصدرك شفت الصليب
حامل القرآن...
بقلمي: سليمان أحمد العوجي.
ليست هناك تعليقات:
إرسال تعليق