...(( برج مايل ))....
مالك يا برج مايل
مال عليك الزمن
ولا التمن كان هايل ......
قالوا عنك كتير
تحذير ورا تحزير
و كإن سرك في بير
و سهم التدليس
للترخيص طايل .....
ناس بلا إحساس
تعلي و تبني
ما يهمها يموت
إبنك و إبني
أنا إيه هنا جابني
و دمعي علي
الخدود سايل........
خليك يا برج شاهد
علي جشع أعمي وحاقد
جنود يضحوا
علي الحدود
و ناس هنا بتموت
بفعل جاحد
عشمان في الدنيا
و كأنه مخلد فيها راقد
و كل ما علي الدنيا زائل........
يا برج مالك زي
منعت عنا الضي
ضارب في الفضا
لجل القضا
منين نلت الرضي !!
و إنت كاتم
علي نفس الحي
ياتري ما شافك
مسؤل الحي
و إنت في طريقه للجامع
و هو رايح و هو جاي ......؟؟
أم حظك معاه قايل.... ؟؟؟
و برج تاني لساه واقف
لحال جاره مقدر و عارف
أخد جاره في حضنه
و الكل بعينه شايف
فرق كبير بين
مهندس عنده ضمير
و مهندس ضميره زائف........
خليك يا برج شاهد
علي عصر أغبر بائد
عصر كان ظالم و فاسد
رشاوي و مشاوي
و كتير بلاوي
و الحُر بعد الصبر
لظلمهم جاهد.......
خليك يا برج شاهد......
د/عمر عبد الجواد عبد العزيز
ليست هناك تعليقات:
إرسال تعليق