♥♥♥إلي روح أبي الغالي رحمه الله♥♥♥
♡♡♡فقد كان لنا مرسى وللبيت أساس♡♡♡
"المرسى"
البيت مبدور بالناس
وأنا جوه عباية الخوف
متلتم إني غريب
ووشوش إخواتي
منقوشه على جدران البيت
أكتم دمعي السايل
وأنزع من لحم الحزن
ضحكايه بدون إحساس
والبيت مبدور بالناس
وازرع وسط الأمل الباهت
سكه بريئة وأهدهد في النجم القلقان
مش راضي ينام
أحضن فيه فيشم ريحة الأحزان
والدمعه المخنوقه ف عيني
ويعافر لجل ما يبعدها
يلاقيني جبان
ويحس الدنيا بدون إحساس
تتمرد مني بقايا العمر
الساكن جوه حنايا الصمت
وأتغرب وأنا حالف ما أرجع
يشتاقلي البيت يملاني حنين
وأحن لطعم اللقمه
أبويا وأمي وحبه من الأخوات
نعطش يسقونا الحكمه
وارجع وأنا شايل كفن الغربه وحلم قديم
وأتفاجئ إن البيت معدوم م الناس
ولأول مره بيصرخ فينا الحق
البيت ده مالوهش
أي أساس
#أحمد__الجندي
ليست هناك تعليقات:
إرسال تعليق