قصيدة الحفله الجديده حفلة ( ابن البلد ) شهر يناير ( تلميذ غبي )
مالها الحياة حالها كده
صبحت وشوش متلونه
ليه قتلنا بأيدنا الهنا
والدنيا صبحت معجنه
تلميذ غبي
اخدت الطيبه معجبي
والرجوله مذهبي
والحب كان مطلبي
تلميذ غبي
ملعون ابو الحب يغور
وازاي يعشش حب اصلا
في قلوب صخور
تلميذ غبي
فهم الحياه اصلا غلط
الحب يرضي يسكن
قبور
ولا عمره يرضي
بقلوب زلط
رشوا البخور
اصله اتحسد
اجدع ولد
لما اخد عزا الضمير
وازاي يصير
الحب علي طبلية غدا
حواليها ناس متجمعه
طابخين حمام
ومعاه فطير
والكل شايل
غدر قلبه علي معلقه
لقمه هنيه وبالهنا
شوربة كوارع بالمواجع
وعيون من الحرقه
مدمعه
ملعون ابوك غش ونفاق
حوالين اسد الديابه متجمعه
تلميذ غبي
يا مربياني تربيه
احسن من تربية الملوك
مش هرضي ابيع كرامتي
ولا هرضي اعيش صعلوك
متخافيش انا مش هموت
ولو شوفتي يوم دفنتي
بالله عليكي مسمعش
صوت
يا مربياني تربيه
ارفعي راسك للسما
و دقي علم طيبتي
وكرامتي
فوق سطوح كل
البيوت
تلميذ غبي
والغباء الاغبي منه
حكم صادر من قانوني
بعد اذن الكل طبعا
نفسي افضفض
ما تسيبوني
ياللي جوزك مش موافق
علي الرجيم روحي اخلعيه
او حتي قدمي شكوي منه
في المحاكم جرجريه
هتاخدي نفقه
هتاخدي شقه
وهتاخدي حضانة ضم طفل
وقاضي يحكم بحكم يظلم
والقانون مقفول بقفل
ملعون ابوك قانون هباب
يامحرضين ع الشخلعه
والمرقعه
وهدوم بنات متقطعه
حللتوا ليه الفجر فجأه
ومنعتوا في الجامعه
النقاب
ملعون ابوك قانون هباب
يا قانون تظاهر
انا جاي طاهر
علشان علي بلدي بغير
انا عاوز اجابه واحده
بس لسؤالي الأخير
ويرد الساده المحترمين
ازاي اعمل ثورتين
من مرار ساكن في
حلقي
واخرتها يدوني حقي
تسلم الايادي طبعا
واغنية بشرة خير
تلميذ غبي
و فرعون شديد
دايما شايفني من العبيد
قولت اسافر قولت اهاجر
رجعت ميت في مركب
رشيد
تلميذ غبي
فهموه ان عرابي ثورجي
ركب حصانه وعارض
الملك
يا معلمين لينا السياسه
في المدارس
وحب الوطن ده منهجي
ازاي اثور لاجل بلادي
واخرتها تقولوا بلطجي
تلميذ غبي
فكر يكون فارس زمانه
كان بيحلم يركب حصانه
وعلشان طبعا حلمه غبي
راح جاب حصان بزمبلك
فكان سهل جدا
يهد احلامه الملك
تلميذ غبي
و اشعاره مليانه شقلبه
مع ان الواد ده غبي
بس عنده جراءة الكلام
فا بيترعب منه الحكام
عليكم السلام
ياللي من شعري
وقصايدي بترتجف
انا الواد المستقيم
المستقام
انا زي حرف الألف
ليست هناك تعليقات:
إرسال تعليق