ما افترقناش / بقلم الشاعر/ صبري على

** ما افترقناش ..

ما افترقناش ......ولكن ..

كلّ واحد منّنا ' ماشى فى سكّة سفر .

لسّة فاكر ' كل سكّة مشينا فيها ..,

كلّ الأماكن,والشّوارع, والمطبّات, والحفر .!

لسّة فاكر ' كلّ حرف مابين شفايفك ..,

شقّ قلبى , وخد مكانه, واتحفر .!

لسّة فاكر ' قلب حبّك ..

 ورغم صدك'كتير وزعلك ..

لقيته سامح, أو غفر .!

قلب آمن كتير' بحبّك ..

ولا عمره مرّة ف يوم كفر .

لسّة فاكر' ...

كلّ كلمة , كلّ بسمة ..

كلّ دمعة , كلّ شمعة ..

كل كلمة سمعها منّك ..

كلّ بسمة ' نوّرت ركن منّه ..

كان معشّش فيه' ظلام .

كل دمعة من عينيك ..

كلّ شمعة مرّة آدها ..

واستعاض كتير' بنورها ' عن الكلام .

لسّة فاكر ' ضيّ عينك ..

شئ منوّر ' فوق جبينك ..

طيف بيسرى بينى , وبينك ..

فاكر حنانك , فاكر حنينك ..

فاكر جنانك ,فاكر ظنونك ..

لسّة فاكر ' هواك, عطرك .. بهاك, سحرك ..

الحقيقة  ' لسّة فاكرك .

علشان كده' أقدر أقول لك :

" ما افترقناش " .

صبري على