إطلاله مُره
( فى شوارع المدينه )
……………………………
جيت للمدينه
وأنا جوايا كتير أحلام
لكن ياخساره
تاهت منى فى الزحام
كُنت بمشى فى بلدى
وأنا مابين الناس معروف
لكن فى شوارع المدينه
منى ياما ألوف وألوف
فى شوراعك يامدينه
شفت العجب
شفت إللى بيتاجر فى الدهب
وإللى بيتاجر فى الألماظ
وإللى بيتاجر فى الخُرده
وإللى بيتاجر بالألفاظ
وشفت رغيف العيش ع الأرض
والجزمه فى فاترينه إزاز
وشفت واحد عنوانه باين من أولو
وليل ونهار مقضيها سُكر وعربده
وسايب مراته وأولاده يتسولو
وشفت واحد متجوز أربع نسوان
وكل واحده حُره فى تصريف أمرها
وهو قاعد ع القهوه ولا السلطان
وإللى تعمله لقمه حلوه يروح لها
وشفت ناس مظلومه ومستحمله
ومش عاجبها حال البلد
لكنها عايزه الإستقرار
وشفت ناس عايزه الفوضى ومكمله
ومش هممها حال البلد
علشان بتقبض بالدولار
الكل بيجرى على الفلوس
وكل همه هياخد كاااام
ولاهمه قطع الرؤوس
ولاهمه حكم الإعدام
والناس علشان الفلوس
بقت عايشه بمبداء
إحينى النهارده وموتنى بكره
وأنا مش عارف أيه بيجرا ؟؟؟؟
حد يقولى أيه بيجرا ؟؟؟؟
إيدي إتشلت والقلم وقع منها
وأحلامى خلاص دبلت وبهتت لونها
بقا بعد كل إللى شوفته هحلم تانى
أكون فنان كبير ومؤلف أغانى
دانا لو وقفت فوق قمة الهرم
وقولت ياليل ياعين
لا فى حد هيسمعنى
ولا حد هيسأل ده يطلع مين
الناس علشان الفلوس بتعد الثوانى
وألف رحمه ونور ع المبادئ
وألف رحمه ونور ع الأمانى
وأنا ساكن فين . . أنا معرفش
لو حد عارفنى يجى يكتبلى
على دراعى إسمى وعنوانى
…………………………
إطلاله مُره
( فى شوارع المدينه )
بقلم الشاعر يوسف الحمله
18/8/2016
ليست هناك تعليقات:
إرسال تعليق