بياع الوهم
بطمع وجهل وفقر وعلم
ازاى تبيع الوهم بفن
فى كل مرة تلاقى نصاب
ذكى ولبق يعمل حركات
نفس الحكاية فى محافظات
يقول حشغل فى الجنيهات
ويدى فايدة وربح تمام
وصيته حلو وأبن حلال
ويجر رجلك كده بشباك
ويدفع فى ربح بالالافات
والناس تقول وكلام ستات
والكل يطمع فى الالافات
ويدوا له رزقه وبالايصالات
يجمع يحوش فى الفكات
ويهرب ده فجأة بدون إشارات
او حتى يعنى تلاقى دجال
وصيته يضرب عال العال
واشاعات لصالحه فى كل مكان
يشفى اللى ممسوس حتى بجان
ويعمل عمل كل الأحباب
ويفتح بسرعة فى الأبواب
والبنت يبعت لها فى عريس
ويفك أعمال من إبليس
واللى عقيمة وعايزة عيال
يفك سحرها كده فى الحال
ويفك برضه جنيه بدولار
وادفع يا عبده ولا تحتار
والكنز مدفون كده يلاقيه
ومربوط يعالجه او يخفيه
أوهام يبيعها كده يا سلام
عشان يبدل حال من حال
والناس تصدق شوف ازاى
وتقول فرجها أكيد أهو جاى
بطمع وفقر وجهل كمان
وعلم فاسد ونقص إيمان
ده الكون ده مخلوق كده بميزان
وكل شىء راح يجى بأوان
والقدرة دايما من الرحمن
هو المجيب عبده الإنسان.
مع تحيات الفقير إلى الله
ياسر شرف
كبير محررين مترجمين
باتحاد الاذاعة والتلفزيون
ليست هناك تعليقات:
إرسال تعليق