بقلمي ( احمد هلال )
ـــــــــــــــــــــــــــــــــ
مابين التوهه والغربه
سنين العمر بتعدي
بتغزل م الوجع سكه
ولا تهدي
وتوب الحلم بات مقطوع
وأحلامي مهيش ف الطوع
ولو عيني صالحها النوم
أشوف كوابيس
وانام دمعي علي خدي
وفرشي صار ماليه الشوك
ولا الدبابيس
ولما إتهد مني الحيل
لقيت الشمس طله هناك
وأنا بتخيل إنه الليل
وشجره كبيره بتضلل علي الجنبين
وصوت الزقزقه يسحر
وكله حنين
ونور هالل مع الموجه
بيتحول بفعل غريب
ووضع عجيب
لشىء ساحر وكله جمال
ولفة عود... تقولش غزال
ورمش كحيل
سهامه بتعلن التسليم
ولون اخضركما البرسيم
دا ساكن جوا نني العين
جمال السحر والتنويم
كا نسمه فجر بتعدي
ف عز الحر بتندي
عروسه من بنات الحور
وألف وأدور
وصوت بينادي وبلهفه
تعال وكون هنا عندي
وأطلب أد ماتطلب
يكون حاضر هنا ف الحال
زكايب مال
دهب وياقوت
قصور من نور
ومتحاوطه بألفين سور
بقيت مش قادر أتكلم
ف نومي هادي ومسلم
كتير من ليلي بتظلم
وفكري يروح وبيودي
علي اللي باستني من خدي
صحيت م نومي متحير
لقيتها هناك
وانا وحدي
ليست هناك تعليقات:
إرسال تعليق