قصيدة بعنوان [ وفاء ......و رثاء]
اهداء: الى اعزالناس
اهديها الى أمى فى عيدها..... وأرثيها فى ذكراها الأولى التى ستحل فى03/04/2016
أمى........
ياحبيبتى ومهجتى و نورعينى....................النهاردا عيدك عايزة هديتك كان على عيني.
عشان مهما عملت.................................مش ها اقدر أجازيكى.
و لا ها اوفى جمايلك...............................من راسك حتى رجليكى.
لكن...بإحساسى ها هاديكى.........................و بكلامى الحلو ها ارضيكى.
يا شمسى فى نهارى................................يا قمرى فى ليلى.
يا همسى فى ليالى وحدتى..........................يا نغمة فى جمال ليلى.
يا ضليلة من لفحة شمس بتكوينى.................يا نسمة ساعة العصارى تحينى.
يا نبع صافى م الحنان بيسقينى....................يا نهر المحبة اللى رويتى بيه محبينى.
يا شجرة أوراقها فى الخريف تدفينى..............و لما يجى الشتا م البرد...تضمينى.
و لما يهل الربيع تكونى فلى و ياسمينى...........والصيف تمسحى عرقه من على جبينى.
يا أرضنا الطيبة.......
يا اللى سمارك شمسنا...............................يا اللى إنزرع فيك زرعنا.
داريتى عليه وحوطتىى..............................وسهرتى عليه و تعبتى.
و آكلتى و شربتى...................................و حميتى و لبستى.
و ربيتى و علمتى...................................و داويتى و مرضتى.
و مسكتى بإيديه......................................تا تا و صبرتى.
و لما إشتد عوده.....................................سميتى عليه و كبرتى.
و خرزة زرقا........................................فى رقبتى و علقتى.
علشان خايفة على زرعك..........................من عين شافت و لا صلتشى.
و لما زرعك كبر.....................................و نشف على عوده ما فرطى.
و هننتى و دلعتى ...................................و طبطبتىى و لملمتى.
و تحت سقف خيمتك ...............................قعدتى و جمعتى.
و فرزتى زرعك....................................و صنفتى.
و اللى كان عوده مايل..............................اخدتى بإيديه و سندتى.
واللى جار عليه الزمن..............................من جيبك ما بخلتى.
واللى زعلان مع اخواته.............................حكمتى بينهم و عدلتى.
طول عمرك ترسمى الفرحة........................وانتى من جوه تإنى.
و عمرك فى يوم ما كليتى...........................و لا قولتى آه و هبطى.
و عمرك فى يوم ما طلبتى..........................و مديتى إيدك و أخدتى.
علشان كدا جازاكى رب العباد.....................عننا و عليكى ما بخلشى.
و قال جنته تحت رجليكى...........................بس إحنا ما بنفهامشى.
بغضبك علينا يا أمى.................................ها نشوف العذاب فى دنيتك.
وبرضاكى علينا.......................................ها ندخل فى الآخرة جنتك.
يارب إهدنا............................................و ارحمنا فى الدنيا برحمتك.
و ما تبخلش علينا.....................................و اجمعنا بيها فى جنتك.
*********************************************************
الكاتب
محسن ابو حمود
19-03-2016
ليست هناك تعليقات:
إرسال تعليق