#براهين_الحب
صحا شعور القلب
وعلقنى ف حبال دايبه
رمانى ف طريق الغلب
والشعار كان اسمه الحب
وصدقت بنيه خايبه
اتعما البصر بالنظر
والبصيره واى حذر
بصمت بصوابعى العشره
إنه دهب مش قشره
وقبل ما بفكر اغلط
كان لسانى بيكون اعتذر
إتحديت نفسى بغباوه
والعند نقيته نقاوه
وبينى وبين نفسى
خلقت بجد عداوه
على نفسى فعلا فضلته
وحطيته فوق كل حاجه
مكان النبض اخترته
وقلتله للأمان محتاجه
القلب طلع محتال
واتاريه قاصد أحتلال
ونفعتنى بأيه السذاجه
ومن حبس أحتياطى
لقلب اعتقال
بقى الجلاد والقاضى
وكمان بطل الابطال
مكنته مكان وكيان
من غير اى نضال
اللوم نفسه احتار
مش قادر يحدد قرار
يعنى اللوم على مين
على نفسى ولا يأسى
ولا الطيبه والحنين
على عندى ولا جهلى
ولا ع الغدار اللعين
اللى فاتح قلبه كمين
وكفرت ببراهين الحب
مهما تحلفلى بمليون يامين
#شيماء_الدالى
ليست هناك تعليقات:
إرسال تعليق