((شو صار ))
شو صار ت حسادنا لعبو فينا
كنا ولاد صغار وعالوفا ربينا
نلعب أنا وإنت عدراج الدار
لا هم ولا أسرار والدني تدور فينا
نهرب يا سمرا من ولاد الجيران
احكيلك قصص وحكايات حب تدفينا
وإذا قلتلك يللا كبري تزعلي
يا ريت الزمن تحت الصفصافي نسينا
اشتقت احفر إسمك عحوراتنا
وبعد ما نتعب نتخبا بفيات الكينا
يا حسرة الزمان دار يا سمرا
شو بعمل بالقصايد اصفرت دواوينا
يا سمرا الزمان غدار تعي
لدروب الهوى قبل ما الشيب يغطينا
بعد سنين غياب عدت للدار
ختيار وحجارتها ما فيها تواسينا
سألتها عن طفلين صغار كانوا
يخربشو حيطانها بكيت وهيي تحاكينا
طبطبت امسح دموعها والعين
بكياني دارنا ما تعرفت علينا
اتركوني بزوايا الطفولي بأصابع صغار
أحفر بتراب دارتنا يمكن توعى بينا
ما عاد بدي إكبر وإحمل هموم
وينك يا طفلي صغيري تعي ولاقينا
نوقف الزمن بزواريب حارتنا
ونرجع نتعلم الفرح بعد ما جافينا
تعي وتعي ولا تخجلي بعدك غنوج
تعي نشبك إيدينا تالدني تصافينا
بدي عند عيونك يخلص المشوار
وادفن حالي بين كفوفك وحس بسكينا
وتغطيني برموشك وتكفني دموعك
وترحمي عقيس ويا دني سامحينا
أمير الغزل
الشاعر حسين ملحم
ديوان حلو الكلام
10/5/2016
ليست هناك تعليقات:
إرسال تعليق