ألبوم صور / بقلم الشاعر / أحمد شاهين
أنا شفت صورى فى الصبا
بصيت لنفسى عِرفتها
الفرحه منى قريبّه
والبسمه ما فى زيها
حنى الملامح مُذهله
ما فى إكتئاب. ولا أسئله
والضحكه طالعه مجلجله
مع أحلى لحظه عِشتها
الماضى ودع سكتى
والدمعه ساقت خطوتى
والفرح ودعنى خلاص
خد أحلى حاجه فى دنيتى
لا فى قبلها ولا بعدها
وانا لسه واقف مطرحى
باصص لصوره فيها ضحكه
يا ذكريات لو تسمحى
شاوريلى أمشى فى أنهى سكه
أنا أصلى ضليت الطريق
والكل خان حتى الصديق
والحُزن ماله مُنتهى
قفلت ألبوم الصور
وحلفت إنى ما افتحه
قعدت باصص للقمر
ونزلت عينى لاجرحه
خليه يلم العاشقين
ويشوفوا نوره يفرحوا
أما إللى زيى عاش حزين .
والذكريات بتطوحه
ما كل شى راح وإنتهى
قفلت ألبوم الصور
وحلفت
إنى
ما
افتحه .
كلمات \ أحمد شاهين
30 \ 9 \ 2017
ليست هناك تعليقات:
إرسال تعليق