كان القطيع
ماشي في سلام
يرعي في أمان
مفيش كلام
هبت عليه رياح قوية
والظلام أصبح مسيطر ع المكان
ظهر الوحوش
والغدر باين في العيون
معتش فيه أبدًا سلام
دخل الوحوش
يبرطعوا وسط القطيع
قامت المدابح
والدم سال...
منظر مريع
الوحوش قتلوا الضحايا ..
وأدمنوا شرب الدماء
ماهى الخيانة طبعهم..
معروفة دايماً عنهم
لكن العجيب
لما تشوف الراعي عادي
وكأن دمه دمهم
ساب الوحوش
تدخل وتأكل في القطيع
واللي أبشع من دا كله
لو تشوف سلاحه هوّ
ماسكه واحد منهم
طب ليه ياراعي
والأصول تكون حماية
مش تشارك غدرهم
ليه تبدد في الأمانة
وتبقى ظالم زيهم
ليه تسيب الوحش
ينهش في الغنم
ليه بتنسى شغلتك
وإنك أنت مؤتمن
بكره هايجي الدور عليك
وهينهشوك زي الغنم
واللي أنت قدمته بإيديك
في النهاية له ثمن.
قلم أمل صلاح
ليست هناك تعليقات:
إرسال تعليق