...... مش هسامحك ......
؛؛؛؛؛؛؛ أشعار ؛؛؛؛؛؛؛؛
:::: عمادالدين العيطة ::::
بعدتنى عنك سنين وسبتنى
وعن حنانك بعدتنى وبعتنى
وسبت العذاب يضمنى
وسلمتنى لليالى والسهر
ويشهد على جرحى القمر
بعدت عنى وسبتنى
وسبت الدموع منى تنول
تنزل .. سيول .. دلوقتى
جاى تقول .. بتحبنى
وعايزنى أسامحك
وفاتحلى قلبك للعتاب
أنا قلبى مات من زمان
ومبقتش أحس الأمان
حتى حنينى قفل البيبان
مبقاش يبان
يادمعة سيبى جفونى
وإحكيله عن حرقة عيونى
إحكى وقولى ..
وإحكى كمان .. إن البعاد
خلى قلبى فى حالة عناد
وفى السهاد ضاع الأمان
ويا آاااه قوليله .. ياآه
إن الحياه غيرتنى ..
وبقت الحياه غير الحياه
وإن الزمان ..مبقاش
دريبى من زمان
مبقاش حبيبى زى زمان
ولا العتاب هو طبيبى ..
ولا الحنان
يافرح فينك تحكى عنى
أنك نستنى ..
وإنك كمان قاسى وظلمنى
ومجتش مرة تزورنى
وسبتنى إنت كمان
لناى حزين يغنى عنى
بعدتنى عن حضن قلبك
وأنا كمان بعدت عنك ..
وهفضل أبعد
وهفضل أعند وأعند ..
ومش هسامحك ..
وإزاى أسامحك ؟
وإنت عنك بعدتنى وبعتنى
وسبت العذاب ..
سنين طويلة يضمنى
والدموع منى تنول
:: عمادالدين العيطة ::
ليست هناك تعليقات:
إرسال تعليق