يا دانيا طارحة فوق وشوشنا الخوف
تجاعيد و توهة و حمل ما يتشال
ما تخفى حبة ع اللى بات ملهوف
و كفاية همه من مرار الحال
مش بردو كان لك لما كان بيشوف
و لا انتى بعتى وقت حمله ما مال
معووجة دايما ع اللى رايد خير
و ف قلبه شايل للاصول موال
يا دنيا حاسبى ... خفى يعنى السير
خلى الخطاوى كارهة للترحال
فى قلوب كتيرة .... عايشة زى الطير
و تملى ساكتة رغم ما بيتقال
خضرة و بريئة عمرها ما تبيع
و ف نن عينها الف عم و خال
سكتها سالكة رغم كل وضيع
و سماها صافية .. سحرها وصال
ضحكتها هادية زى طفل رضيع
حلوة و رقيقة زى راحة البال
فان كنتى ناوية ع اللى مش مقبول
بشويش عليها .. و احسنى الاعمال
يعنى الليالى مش ضرورى تطول
و بلاش تخلى نجمها أفال
سيبى لنهارها باب ماهوش مقفول
و يكون شروق الفجر كله جمال
#فهمى_على
ليست هناك تعليقات:
إرسال تعليق