الشكــــــــوك ::من ديوان عبير المصراويه
؛؛؛؛؛؛؛؛؛؛؛؛؛؛؛
باحبك .. لكنك جنونى العواطف
أجيلك .. أجيلك ..
وشوقى سابقنى مراكب .. مراكب
لكنك تقابل شراعها بشكك .. وريح العواصف
ولما بدموع نتحّ فى قرارنا ..
تبص فى عنيّه طويلاً .. طويلاً ..
وتهمس : " حبيبتى .. أنا .. ألف آسف
دى آخر مقابله أحرك دموعك .. خلاص .. صدقينى "
أصدق .. واجازف
باحبك .. لكنك جنونى العواطف
مراكبك غريبة التحرك .. مراكبك
بتغلط .. بتغلط .. وتغلط .. فى حقى
وتبكى إذا لحظه حبيت أعاتبك
لا انا يا حبيبى ..
ضعيفه عشان أرتضى بالجراح دى
ولا يا حبيبى قويه عشان .. يا حبيبى أحاربك
باحبك ..ونفس الشعور انت شايلُه .. وعارفُه
وعازفه عن الكل لاجلك .. وعازفه
وعازفه عشانك ..
نغم رغم دمعى وجرحى ونوحى
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
عبير الجندى .
عبير المصراويه
ليست هناك تعليقات:
إرسال تعليق