الشحادة عادة. ..بقلمي. ..
..........................
كل ما طلعت برا الباب بلاقي شي ألف شحاد
وكل ما بمشي شي خطوة بيجي واحد بيقول هات
وبيقلي من شان الله عطيني اشتري الخبزات
بدنا ناكل ما معنا استرلي ع هالحريمات
وانا فقير اكتر منهم بس ما بمارس لشحادة
لأني بستحي كتير وكتير سيئة هالعادة
لكن ما بتستحي الناس وكلا صارت شحادة
وانتشرت هالمهنة كتير ولشحادة صارت عادة
ومرة انا راجع ع البيت وقفني واحد شحاد
وقلي يا عمي دخلك احترقت اختي ام عناد
وكتير صعبانة عليي وبدي عالجها خطية
وتا اخدها ع المشفى مافي ولا مصرية
بسرعة فتحت هالجزدان ما لقيت غير خمس مية
وعطيتو ياها بالحال والله يعوض عليي
ورجعت على بيتي عم هوي بإيديي
ونمت يوما ما تعشيت وما حدا خبر فيي
وبعدا بشي اسبوعين مسكني نفس الشحاد
وقلي ايدي بزنارك ابني احمد عم يبحت
والولد مرضان كتير ومافي معي مصاري
وبدي أخدو ع الدكتور من شان الله يا خالي
وعرفتو انو كذاب وعم يضحك عليي
ولشحادة إلها أساليب كتير ملتوية وخفية
واحد بيبكي وبينوح والتاني بيمسك فيي
والحالة صارت بالويل والقصة مأساوية.
................................
د.ملك محمود الأصفر
ليست هناك تعليقات:
إرسال تعليق