🙏🙏🙏🙏🙏🙏...مناجاة الروح...🙏🙏🙏🙏🙏🙏
ليش في ناس بتخلق وهيي عم تضحك
وناس بتولد والحزن ناطرها ع بَكْيِّر
آخ هالبسمة قديشها غالية
لا بتنشرى بمال ملك ولا بمال امير
بس والله يا ربي الحزن بيعتم القلب
وما بيعود فينا نستهدي ع الدرب
خبروهن،اني بقيت ماشي لوحدي
لا رفيق ولا حبيب ولا حدا حدي
يمكن الريح سرق الفرح من عيوني
ويمكن الحزن عامل بيتو بجفوني
لكن يا ريت وشو بينفع اللوم يا حسرة
ان كان الهم معَوّْد وماخذ علينا كسرة
وكيف فينا نعيش ع امل يعود المسافر
تركنا وراح وقال سامحوني انا مهاجر
طَلّْعْت وفتشت وتعبني جور هالأيام
وقعدت ع ضو القنديل راجع حسابي
مرقت قدامي صور وحكايات
وحبيت انسى ونام وأغلق بابي
وكل ما حاولت غمض عين،تفَتِّحْ عين
والوسواس يقللي لوين رايح لوين
رح قول للطيور الرايحة ع مكان بعيد
دخيلكن خذوني معكن ت اتفرج عالعيد
احبابنا راحوا ويمكن نسيوا يودعونا
فكرهن هونيك ما بعرف وين
حاملين اكاليل الغار والريحان
وبدمعة وغصة قلب يقولوا....سامحونا.
بقلمي:يوسف محمود شحرور.
ليست هناك تعليقات:
إرسال تعليق