هفضل شاريه
هفضل شاريه لاخر لحظه
هفضل واقفه وهفضل ثابته
هاجى على نفسى اول مره وهاجى التانيه
ولما هحس الاولى والتانيه مش فرقنلك
يبقى التالته هتبقى التابته
لما هحس انك مش فارق
يبقى ساعتها لازم افارق
بس انا شاريه وهفضل باقيه
هفضل فاتحه ليك الفرصه
قبل ماتيجى اللحظه الناهيه
هفضل اراهن قلبى واقوله
انك شارى ومش هتسيبه
وهفضل اقول للناس هيجيلى
ومش هيهون عليه حبيبو
هفضل ماسكه فى حبل ودادنا
وهستناك تمسكه ويايا
ولما هيفلت يوم من ايدك
يبقى ساعتها لازم اسيبه
بس الحبل فى ايدك لسه
وانا مسكاه من الناحيه التانيه
قرب خطوه هقرب خطوه
ساعدنى نخطى الخطوه التانيه
ساعدنى نقرب ونعديها
وعواقب الدنيا نخطيها
وإن صدفتنا حاجه صعبه
انا وانت هندوس عليها
لاكن اوعى فى يوم تستعجل
وتروح دايس على حاجه تانيه
خليك فاكر انى حاربت عشانك الدنيا
وجه الوقت اللى انت تحارب مره عشانى
قدم خطوه او افتح باب مقفول قدامى
قرب خطوه هتلاقى منى الخطوه التانيه
واياك تنسى انى حاربت عشانك الدنيا
ولسه بحارب . لسه باقيه ومستنيه
اعمل حاجه ده فراقنا عمال بيقرب
مد ايديك هتلاقى اديا
خليك فاكر انى راهنت ان احنا هنرجع
اياك تخذل اياك توجع
وانا عن نفسى هفضل شاريه
لاخر لحظه
بقلمى /امال مصطفى الشامى
9/7/2018
ليست هناك تعليقات:
إرسال تعليق