دعوة للتفاؤل
هافتح أنا لِ الدُنيا دراعى
وكأن الكون كلُّه بتاعى
وأدَاعب نِسمة هَوا جايّه
عاشقه ومُشتاقه لِسماعى
وفراشه حِلوه وشَقيّه
تِترقّص.. أيوَا على دراعى
واكتب أشعارى بحنِيّه
والسَما هاتشَاهِد إبداعى
تِبعت لِى نجومها تِتبَعنى
وقَمرها يحرُسنى كَمَا الرَاعى
وهاغنّى وأقولّك ياعنيّا
بِكفايا بُكا مِن غِير دَاعى
واحلِف فى الأيّام الجَايّه
إنى انسى أَلمى وأَوجاعِى
وابعت دعوة حُب جميله
واكتب فيها أنا الدَاعِى
واعبر بحر اليأس واعدّى
والضحكه راح تبقى شِراعى
وانشر فرحى فى كل الدنيا
حتى الدنيا كمان ما تْسَاعى
بقلم/ سيد عبدالوهاب
ليست هناك تعليقات:
إرسال تعليق