ليه لما كنا صغيرين كانتن عيونا بريئة.
ليه لما كنا صغيرين كانت ضحكتنا حقيقة.
ليه لما كبرنا اتغيرنا
ليه فرحتنا مش زى زمان.
يا ترى احنا اللى اتغيرنا
ولا اتغير الزمان.
السما هيا هيا زى زمان صافية.
و الورد لسه زى زمان بيفتح.
و الشمس هيا هيا لسه بتطلع.
و الضحكة لسة زى زمان بتفرح.
بس لما كبرنا
الشوك ملا قلوبنا.
بنحاول نرسم بسمة
و الدمع مالى عيوننا.
العيون هيا هيا زى زمان بتشوف.
و القلب لسه زى زمان بيدق .
و العقل لسه زى زمان بيفكر.
و كل الناس لسه للجمال بترق.
اممال ايه الحكاية
و فين جواب السؤال.
طب ليه عاوزين اجابة
ما نغير السؤال.
ازاى نرجع زى زمان
نحضن الفرح، و نهجر الأحزان.
أقوللك ازاى
نملا قلوبنا حب طاهر شريف.
نرجع عقلنا زى زمان عفيف.
و لما تشوف عينينا الجمال
تسبح اله الخليقة
و نملا نفوسنا رضا
ترجع ضحكتنا حقيقة...
الشاعر العجوز
مرقص اقلاديوس
ليست هناك تعليقات:
إرسال تعليق