بالعمل والكفاح بقلم \ أحمد شاهين
ركِز ودقق فى التفاصيل
تلقى الجمال ممزوج بدموع
خليك فى وسط الناس قنديل
هتشوف ضحايا وذل وجوع
هتشوف مواطن مصرى ذليل
أسياده . بيسموه جـربـوع
وتشوف مبانى حاضنه النيل
أسوارها رافضه أى خضوع
ركِز ودقق فى التفاصيل
واتمنى بُكرا يكون له نهار
والله . تِعبنا من التهويل
راح نبقى زى (بلاد) تنهار
مذكوره بلدى فى التنزيل
محميه من كل الأخطار
ركِز ودقق فى التفاصيل
أيه العمل وإحنا بنِشحت
طول عمر حظ بلدنا قليل
وم البدايه إحنا بنِفحت
راح فى القناه كام ألف قتيل
من الضحايا وإفُتتحت
درس الركوع من جيل
ورا جيل
من عهد رمسيس وبننحت
ركِز ودقق فى التفاصيل
وإرجع لربك ( مالوشريك)
ما تقولش حظى ماله قليل
وإدعييه دا وحده إللى بيدييك
وإياك تعيش العمر عليل
وتخلى غيرك يشمت فيك
ما تقولش قالوا كفايا تأويل
(وإنتج ) ضرورى الله يخليك
ركِز ودقق فى التفاصيل
سجِل تاريخ إنت ما عِشتوش
بس كفايانا غُنا ومواويل
وراحوا الحبايب ولا رجِعوش
خليك مواطن مصرى أصيل
( بالإختراع ) مش بالفنكوش
علِمك سلاحك يا بن النيل
وإبدء كفاحك وسِط وحوش
ركِز
ودقق
فى
التفاصيل
كلمات \ أحمد شاهين
23 \ 7 \ 2017
ليست هناك تعليقات:
إرسال تعليق