مش م الأنبياء
...............
إرسميني يا دنيا حاجه
أي حاجه انشالله فكره
واحدفيني ف حضن بُكره
ربما اليوم اللي حاضر
يختشي على دمُّه ساعه
قلبي مُش ..
دُكان بضاعه
عقلي مُش ..
صيّاد ناموس
بطني فيها العرق سوس
طعمه يبقى بطعم فودكا
كل ثانيه بالاقي شكّه
م الدبابيس الكتيره
والخوازيق اللي أكتر
مستحيل الحلم يكبر
قبل ما يكمّل رضاعه
أو يكون واخد مناعه
ضد رُخص الإنسانيه
والفواتير اللي حاله
من حالات اللولبيّه
كهربا ..
ف المخ زايده
رغم هيّ لمبه واحده
ميّه ..
تحت الجلد زايده
كُلُّه من حنفيّه واحده
غاز ..
مافيش ولا شعله قايده
أصل هيّ طقّه واحده
كام مرض عاملين مزايده
والهجوم مش واحده واحده
واللي زاد فعلا وغطّى
كام روشته بخط أهوج
إبني كان بالهدمه أحوج
بنتي عايزه الساندوتش
راضي يبقى غدايا مش
برضه معدن
برضه آشيه
برضه عايش
رغم سقف الأوضه بايش
والجدار مشقوق ويشبه
غار حراء
أيوه مش م الأنبياء
بس راضي
حفّظوني نشيد بلادي
رغم باب البيت مخلّع
كنت باحلم روحي تطلع
بس هيّ كمان معانده
رغم ضعفي روحي جامده
يبتسملي الريح ويلدغ
زي لدغات العقارب
سوس خشب شبّاك موارب
والجوانب .. غاويه فُرقه
إحضنيني يا دنيا صدقه
واللا خلّي القطر يوصل
للمحطّه ..
بدري يوم
..................................
ليست هناك تعليقات:
إرسال تعليق