كلمتين وبس 4
يا جماعه اتوبيسات النقل العام رفعوا الأجره فيها
يعنى انا افتكر زمان كنا بنركب الأتوبيس من دول يفضل يمشى بيك ،، ساعه يمكن ،، وكان ياخد قرشين صاغ ،، بعدين القرشين بقوا خمسه ، شويه شويه بقوا عشرة قروش ،،،
وطبعا مع مرور الوقت والزمن وتطور التكنولوجيا والصاروخ النووى والحروب والدمار والإرهاب ووووووو اصبح الجنيه مالوش قيمه ،
وتدهورت الحاله الإقتصاديه ، والبلد حاولت تعمل عملية إنعاش للجنيه قبل ما يفطس فيادوب لحقنا الحمدلله يعنى اهوه برضه اسمه جنيه ، كان زمان اسمه الحاج جنيه ، المهم الجنيه دلوقتى يا دوب تجيب بيه رغيف حاف ، انتوا عارفين طبعا الكلام ده كويس ،،،
الكلام دلوقتى على الناس الغلابه اللى بتركب مواصلات وعلشان تركب مواصلتين تلاته مثلا عاوزلك على الأقل عشره جنيه فى اليوم وانت رايح وزيهم وانت راجع ،
يعنى تعمل مرتب للهيئه بتاعة النقل شهريا كده خمسمائة جنيه من كل واحد بيركب اتوبيس ،
طيب ما تيجوا نحسبها كده حسبه صغيره :
هو فيه كام خط اتوبيس فى مصر المحروسه ؟
وفى كل خط من دول فيه كام عربيه ؟
وكل عربيه من دول ، بتعمل كام دور فى اليوم ؟ و
فى كل دور كام واحد بيركب العربيه دى ؟
يااااااااااااه دا الموضوع كبير قوى على كده ،، انا لو قعدت اتكلم فى الحسبه دى هتجنن صدقونى ،
موش كده واللا ايه ؟؟؟
ليست هناك تعليقات:
إرسال تعليق