كلمتين وبس 2
ايه رأيكوا فى مذيعات التليفزيون بتاعنا ( المصرى ) ؟
هحكيلكوا حكايه صغيره حصلت معايا شخصيا ، من حوالى شهر تقريبا او شهر ونص كده كنت قاعد باتفرج على قناة سى بى سى اكسترا وكان فيه بعد شويه ماتش كرة قدم ، وجات مذيعه صغيره كده وشايفه نفسها انها حلوه حبتين ، وعلى فكره هما بيختاروا المذيعات بالجمال بس موش بالتربيه ولا التعليم ، آه بجد ولا تربيه ولا تعليم
لأنك علشان تبقى قاعد بتتفرج على مذيعه قدامك واقفه او قاعده كإنها على سوست بتتهز من كل حته فى جسمها والمكان الثابت ، هى تهزه بالعافيه ،
يعنى تلاقى الواحده من دول كل كلامها لغويا غلط فى غلط ،
وتحدف راسها شمال فوق شويه ، علشان قال ايه تبعد الشعر عن عنيها ، وبعد دقيقه تبتدى تنزل فى رقبتها بالراحه ، علشان شعرها ينزل تانى على عنيها ، وتروح رافعه راسها وتحدف يمين فوق والأدهى انك تلاقى كتافها شويه قدام وبعدين ترجعهم ورا ،
الله انت بتدى معلومات للمشاهدين واللا بتدورى على عريس يا شابه ؟
المهم ، فيه فريق كوره اسمه أسود الكاميرون ، أسود يعنى وحوش أسوووود بضم الألف والسين ،
لقيت المذيعه بتقول اسود الكاميرون بكسر الألف وسكون السين وكسر الواو وسكون الدال
يعنى خلتها الوان اسود واحمر واصفر ،
صدقونى الكلام ده حصل وسمعته بودنى وشفته بعينى ،
والله عليها بقى لما تيجى تقرا نشرة الأخبار ، تقولك ايه ، دباجه كاتبينها لكل المذيعين والمذيعات : الرابعه عصرا بتوقيت القاهره الثانيه بتوقيت جوينتش ، جوينتش ، موش جرينتش ، لأ جوينتش ، يعنى لازم تنطق الره ، واو ، وبالعافيه ، وتضم قوى فى شفايفها ، يعنى حاجه تشل بعيد عنكم ،،،
بقى ده اسمه كلام يا عالم ؟؟؟ أمتى بقى هنتعلم نختار صح بالضمير موش بالكوسه ولا الواسطه
أمتى هنتعلم صح ونحاول نقلد التانيين بالعقل ، موش بالجهل والفضايح ،
منكم لله يا بعدا ،،،،
موش كده واللا ايه ؟؟؟
ليست هناك تعليقات:
إرسال تعليق