كلمتين وبس 5
بكل امانه وصدق ان كل حرف من الكلمات اللي هقولها دلوقت حقيقي وصحيح ،
في يوم من فتره كده عربيتى عطلت فركبت تاكسي ، قعدت جنب السواق لقيته سااااارح وعمال يكلم نفسه ويشاور بإيديه ويعمل حركات غريبه كده ويكشر شويه ويبتسم شويه ، ، ،
الله ايه الحكايه ؟ بصراحه انا قلقت ، الراجل شكله موش طبيعى خالص ، فبسأله ، مالك يا ريس ؟ فيه حاجه مزعلاك ؟ بص عليه وقاللي : يعني يا بيه لو حكيتلك المشكله هتحلهالي ؟ قلتله احكي يمكن اقدر اساعدك ،،،
السواق : انا يا بيه ساكن في عماره اربع ادوار ، كل دور اربع شقق ويمكن حضرتك تعرفها ، العماره اللي قصاد قسم مصر الجديده ،
انا : آه عارفها ، اللي حواليها شمال ويمين برجين وهي في الوسط ،،،
السواق : تمام سعادتك ، في يوم جالي صاحب العماره دي وقاللي يا عم احمد انا عاوز اهد العماره وابني برج زي اللي حواليه دول ، ايه رأيك انا هديلك سبعين الف جنيه وتشوفلك مكان تاني ؟ وعلى فكره انا عديت على السكان كلهم وقولتلهم كده ،
المهم يا بيه ، فيه ناس وافقت وخدت الفلوس ومشيت وناس مارضيتش ،
أللي فضلوا قاعدين اربع شقق من الستاشر شقه ، معايا يا باشا ؟؟؟
قلتله ، معاك يا عم احمد ، قاللي الأربع شقق دول كنت انا وشقه جنبي في نفس الدور وشقتين تانيين منهم شقة الحاجه ام صلاح العجوزه دي اللي هي اساس المشكله بتاعتي !!!!!
قلتله ، فسر يا عم احمد ،،،
قاللي ، الحاجه ام صلاح دي في التسعينات وابنها الوحيد معندهاش غيره الحاج صلاح متجوز اجنبيه في المانيا وكلمة ملياردير قليله عليه ، ، يعني ربنا يزيد الناس كلها يارب ، عنده فلوس محدش يعرف يعدها من كترها سايب امه وحدها في الشقه دي وهو عايش بره المهم يا بيه صاحب العماره راح قال للحاجه ام صلاح زي ما قاللي على السبعين الف دول ، فالحاجه قالتله يا حاج انا مقدرش ارد عليك دلوقت لما اشوف رد ابني ، قاللها ماشي يا حاجه ردي على ابنك وابقي ردي عليه ومشي ، الحاجه اتصلت بابنها وقالتله ، رد الحاج صلاح على امه وقاللها خلاص يا حاجه انا جاى اشوف ايه الموضوع ، بعد كام يوم كان صاحب البيت مشى البواب كمان وجه الحاج صلاح راح لصاحب البيت اخد منه الفلوس وطلع على شقة امه وباع العفش اللي فيها كله وخد الحاجه والدته اللي عندها حوالي تسعين سنه حطها فى اوضة البواب وسابها وسافر !!!!!!!!! بس حل بقى يا بيه ، ،،،،،،،،،، طبعا البيه تنح صدقوني ، اتلهيت معرفتش ارد من الصدمه ، كمل عم احمد السواق وقاللي إتلمينا احنا التلاته الباقيين ( التلات شقق) خدنا الغلبانه دي ووديناها دار مسنين وكل شهر كل واحد مننا بيدفع جزء ،،،،،،،
ممكن حد يحل المشكله دي ؟ انا عن نفسي غلبت افكار وحلول لغاية لما قلت لنفسي : عندك حق يا عم احمد انك تكلم نفسك ، موش كده واللا ايه ؟؟؟
ليست هناك تعليقات:
إرسال تعليق