انا امراه /بقلم الشاعره/امال مصطفى الشامى
************************************
سألونى وقالو مين انا
وفات من عمرى كام سنه
رديت وقلت انا صبر مرير
انا ورده مفقود منها العبير
انا اللى فات من عمرى كتير
ومتحسبش ولا سنه
قالو هيكون كام عمرها؟
دى لسه بنت صغيره
حلوه ولسه فى عزها
بيها القلوب متحيره
بعيونها الحزينه السود
والدمع اللى على الجفون مفرود
والشعر اللى على الخدود سايب
رديت وقلت
انا اللى شعرى فى الصبا شايب
انا اللى ماليش من الحظ نايب
قالو منين الصبيه ؟ومن انهى بلد ؟
قلتلهم انا من بلاد العجايب
مافيهاش اصحاب ولا فيها حبايب
سالو وقالو فين عنوانها؟
رديت وقلت
ماليش عنوان غير احزانى
تايهه وسط بشر بسال
دلونى يا ناس على عنوانى
شاورو عليا وقالو
مين هى دى ؟وايه امرها؟
رديت وقلت
انا وحده فاقده عمرها
فاقده الامان فاقده الزمان
ماشيه الحياه بضهرها
انا واحده فاقده المستقبل
وواخده ماضيها فى حضنها
سالو وقالو مين اللى جرح قلبها؟
قلت الزمن هو اللى كسرلى فرحتى
قالو ياترى مين السبب فى جرحها ؟
قلت النصيب هو السبب فى كسرتى
قالو ياترى ايه اللى حصلها ؟
قلت القدر .كتب عليا حسرتى
قالو نسينا نسالها عن اسمها
قلت امل . لكن مفقود
امال فى حبال متعلقه
اسمى مع المجاريح مكتوب
امال كتير متفرقه
انا عيون ماليانه دموع
بالكحل متزوقه
انا طفله بتتشاقه وبتعيط
طفله فى عز ضعفها
وانا قوة راجل شارب
مرار الصبر بمعلقه
انا إمرأه
